ሐዋርያው "...ትፈወሱም ዘንድ እያንዳንዱ ስለ ሌላው ይፀልይ ። የጻድቅ ሰው ጸሎት በሥራዋ እጅግ ኃይል ታደርጋለች ። /ያዕ 5:16/ ባለው ተረጋግጧል ። ቅዱሳንም ራሳቸው ሌሎች ሰዎች እንዲጸልዩላቸው ጠይቀዋል ። "...ስለኛ ጸልዩ " (2ኛ ተሰ 3:1 ) ለዕብራውያንም "ጸልዩልን በነገር ሁሉ በመልካም ሁሉ እንድንኖር (ዕብ13:18) በመጽሐፍ ቅዱስ አንዱ ለሌላው እንዲጸልይ የተጠየቀበት ሁኔታ ብዙ ነው ። ታድያ ቅዱሳን እንድንጸልይላቸው እኛን ከጠየቁን እኛ ደግሞ እነርሱ ስለኛ እንዲጸልዩልን አንጠይቃቸውምን ? ገና በዚህ ዓለም በመንፈሳዊ ጦርነት ሳሉ ለመከራ የተጋለጡትን ቅዱሳንን እንዲጸልዩልን ከጠየቅን ተጋድሏቸውን የፈፀሙና በገነት ከክርስቶስ ጋር ያሉትን እንዲጸልዩልን አንለምናቸውምን ? ፡ሌላው #እግዚአብሔር_ሰዎች_የቅዱሳንን_ምልጃ_እንዲጠይቁ_ፈቅዷል ። እግዚአብሔር እራሱ የቅዱሳንን ምልጃ ጠይቋል ተቀብሏልም ። እንዲሁም ምልጃ እንዲቀርብ ሰዎችን ወደ ቅዱሳን ልኳል ። እስቲ ለዚህ ማስረጃ እናቅርብ ። " አባታችን #አብርሃም ሣራን እህቴ ነች ስላለ ንጉሱ አቤቤሜሌክ ሣራን ወደ ቤተ መንግስት ወሰዳት ።ጌታም ወደ አቤሜሌክ በህልም መጣ በሞትም አስፈራራው ። አሁንም የሰውዬውን ሚስት መልስ ነብይ ነውና #ስላንተም_ይፀልያል ትድናለህም ። ባትመልሳት ግን አንተ እንድትሞት ለአንተ የሆነውም ሁሉ እንዲሞት በእርግጥ እወቅ" ። /ዘፍ 20:7/ አቤሜሌክን እግዚአብሔር ሣራን እንደመለሰ ወዲያውኑ ሊምረው ይችል ነበር ። ነገር ግን ይቅር ይባልና በሕይወት ይኖር ዘንድ እግዚአብሔር #የአብርሃምን ምልጃ ጠየቀ ። #የኢዩብ_ታሪክ ፦ "...በእግዚአብሔር ቴማናዊውን ኤልፋዝን እንደ ባሪያዬ በአንተ በሁለቱ ባለንጀሮችህ ላይ ነድዶአል ። አሁን እንግዲህ 7 ወይፈኖችና 7 አውራ በጎች ይዛችሁ ወደ ባሪያዬ ወደ ኢዮብ ዘንድ ሂዱ የሚቃጠልንም መስዋዕት ስለራሳችሁ አሳርጉ ባሪያዬም ኢዮብ #ስለእናንተ_ይጸልያል። እኔም እንደ ስንፍናችሁ እንዳላደርግባችሁ ፊቱን እቀበላለው ። /ኢዮ 42:7/ ከላይ ባየናቸው በሁለቱም ሁኔታዎች እግዚአብሔር ራሱ ለበደለኛ ሰዎች ተናገረ። ሆኖም ራሱ በቀጥታ ይቅርታን አላደረገም ። ነገር ግን የቅዱሳንን ጸሎት ጠየቀ። ይህም ቅዱሳን በሰዎች ፊት ይከብሩ ዘንድ ነው #ስለ_ሰዶም_የአብርሃም_ምልጃ አብርሃም ጉዳዩን ሳያውቀው እግዚአብሔር ሰዶምን ሊቀጣ ይችል ነበር ። አብርሃም በእግዚአብሔር ፈቃድ ጣልቃ አልገባም ። ነገር ግን ጌታ ለአብርሃም ስለ ሰዶም ምልጃን ያቀርብ ዘንድ ጉዳዩን ገለፀለት ። ምልጃውንም ተቀበለው ። አብርሃም በሰዎች ፊት ከፍ ከፍ ይል ዘንድና እኛም ስለቅዱሳን ክብር እንድንረዳ ይህ በመጽሐፍ ይጻፍ ዘንድ የእግዚአብሔር ፍቃድ ሆነ ። /ዘፍ18:17/ #ሙሴ_ስለእስራኤል_ምልጃን_እንዳቀረበ በወርቅ የሰሩትን የጥጃ ምስል አምልከዋልና እግዚአብሔር ሕዝቡን ሊያጠፋ ወደደ ይህንንም ለነብዩ ሙሴ አሳወቀው ፤ ስለ ህዝቡ ምልጃ እንዲያቀርብ ዕድል ሰጠው ከዚያም ምልጃውን ተቀበለው ። ልክ አብርሃም "እግዚአብሔርን እንዲህ ያለው አድራጎት ከአንተ ይራቅ " እንዳለው ፤ ሙሴም " ... እግዚአብሔር በሕዝብህም በክፋታቸው ላይ ራራ አለ ..." እግዚአብሔርም በሕዝቡ ላይ ሊያደርግ ስላሰበው ክፋት ራራ ። /ዘጸ32:7/ እኛም ይህን አብነት አድርገን ቅዱሳን ይጸልዩልንና ይማልዱን ዘንድ እንጠይቃለን ።