📌ርክበ ካህናት ማለት ምን ማለት ነው? 🔘ርክበ ማለት ረከበ ከሚለው የግእዝ ዘር የተገኘ ሲሆን ረከበ አገኘ ርክበ ማግኘት መቀበል ማለት ነው።ርክበ ካህናት ስንልም የክህነት መቀበል ማግኘት መገናኛ ተብሎ ይተረጎማል። በቤተ ክርስቲያናችን ሥርዓት ከትንሣኤ በኋላ በ25ኛው ዕለት ወይም የበዓለ ሃምሳ እኩሌታ ላይ የሚውል በዓል ሲሆን ምን ጊዜም ዕለተ ረቡዕ ላይ ይውላል፡፡ 📌ርክበ ካህናት ለምን በበዓለ ሃምሳ አጋማሽ በዕለተ ረቡዕ ሆነ? 🔘ለቅዱስ ጴጥሮስ ( ለቤተ ክርስቲያን ) በጎቼን ጠብቅ፣ ጠቦቶቼን አሰማራ፣ ግልገሎቼን ጠብቅ በማለት ሥልጣነ ክህነት የተሰጠው በበዓለ ሃምሳ አጋማሽ በ25ኛው ዕለት በዕለተ ረቡዕ በመሆኑ ነው። 📚ዮሐ፦21፥15-17👈ይነበብ። 🔘ክብር ይግባውና ጌታችን ለሐዋርያት ሥልጣነ ክህነትን እንደ ሰጣቸው ከላይ ካየነው ጥቅስ ባሻገር እንዲህ ብሏቸው ነበር፦ ✍️“እውነት እውነት እላችኋለሁ፤ በምድር የምታስሩት በሰማይ የታሰረ ይሆናል፤ በምድርም የምትፈቱት በሰማይ የተፈታ ይሆናል”እንዲል። 📚የማቴ፦18፥18👈ይነበብ። 📚ማር፦16፥19👈ይነበብ። ✍️“…ይህን ብሎ እፍ አለባቸው፤ እንዲህም አላቸው፡-መንፈስ ቅዱስን ተቀበሉ።ኃጢአታቸውን ይቅር ያላችሁላቸው ይሠረይላቸዋል፤ ይቅር ያላላችኋቸው ግንር አይሰረይላቸው” እንዲል። 📚ዮሐ፦20፥22-23👈ይነበብ። 📌ቤተ ክርስቲያን በዚህ ዕለት የምታከናውነው ሥርዓት አለ? 🔘እናት ቅድስት ቤተ ክርስቲያን በዚህ ዕለት ከምታከናውናቸው ሥርዓት አሉ ከእነዚህ መካከልም የሚከተሉትን ሥርዓቶች ታከናውናለች።እነርሱም፦ 1ኛ፦ሲኖዶስ፦ሲኖዶስ ማለት ቃሉ የግሪክ ሲሆን ትርጉሙ አባቶች ስለ ነገረ ክርስቲያን የሚገናኙበት ጉባኤ ማለት ነው።ጉባኤ የግዕዝ ቃል ሲሆን ትርጓሜውም ቅዱስ ስብሰባ ማለት ነው። 🔘በክርስቶስ አምነው ክርስትና በተቀበሉት አሕዛብ እና በክርስትና ባመኑት አይሁድ መካከል የተነሳውን ችግር ለማስወገድ ሐዋርያት የመጀመሪያውን አድርገዋል። ይህ ሲኖዶስ (የሃይማኖት ጉባኤ) ከ49-50ዓ.ም መካከል በጌታ ወንድም በያዕቆብ አማካኝነት ተከናወነ። 📌የሐዋርያት ሲኖዶስ ውሳኔ እንዴት ነበር? 🔘ከአህዛብ የሚመለሱ ክርስቲያኖች ከዝሙት እንዲጠበቁ ( አይሁዳውያን ይህንን ጥያቄ ያነሱባቸው ነበርና ከዚህ ይቆጠቡ ዘንድ ይህንን ውሳኔ አስተላልፈዋል መፈተን ይኖራል ያልተፈተነ ክብር ስለማያገኝ እንዲጠነክሩ በማሰብ ) አህዛብ ደም አንቅቶ የሞተውን እንዳይበሉ ( ያልተባረከ ከብት እንዳይመገቡ ሲል ነው ) ለጣኦት የተሰዋውን እንዳይበሉ አህዛብን በመምከርና በማስተማር የሙሴን ሕግ እንዲያውቁ ማድረግ እንጂ ማግለል እንደማይገባ ውሳኔ አስተላልፈዋል። 🔘በተጨማሪም ስለ ቤተክርስቲያን፣ ስለ ሥርዓተ ቤተ ክርስቲያን፣ ስለ ካህናት አገልግሎት፣ ስለ ምዕመናን ድርሻ አብጥሊስ ግፅው ዲድስቂልያ በተሰኘ መጽሐፋቸው ወስነዋል። 📚ሐዋ፦15/ (16 1-3)👈ይነበብ። 🔘ሐዋርያዊት የሆነችው ቤተ ክርስቲያናችንም ሐዋርያትን አብነት አድርጋ ለነገሮች ሁሉ ምላሽ ለመስጠት በዓመት ሁለት ጊዜ ሲኖዶስን ታደርጋለች።ዕለታቱም ጥቅምት 12 እና የበዓለ ሃምሳ እኩሌታ ናቸው። 🔘ጥቅምት 12 ታላቁ ወንጌላዊ ማቴዎስ ሰማዕትነትን የተቀበለበት (ያረፈበት ዕለት ነው) እንደሚታወቀው ይህ ወንጌላዊ ኢትዮጵያ መጥቶ ያስተማረ፣ ስለ ኢትዮጰያውያን ከሌሎቹ ወንጌላውያን በተለየ በወንጌሉ ላይ የጻፈ ( በወንጌሉ ላይ ስለ ኢትዮጵያውያን መጻፋ ኢትዮጵያ ሐገር መጥቶ እንደ ነበር ማስረጃ መሆኑን አበው ሊቃውንት ያስረዳሉ፡፡ይኸውም ስለ ኢትዮጵያዊትዋ ንግሥት ማክዳ በምዕራፍ 12 ላይ ጽፏል፤ በምዕራፍ 2 ደግሞ ስለ ሰብዓ ሰገል ጽፏል / ከሰብዓ ሰገል መካከል ኢትዮጵያውያን እንደነበሩ ቅዱስ ዳዊት በ71ኛው ዝማሬው፦ ✍️“የሳባ ነገሥታት እጅ መንሻን ያመጡልሃል” ያለው አስረጅ ነው። 🔘ስለዚህ ቅዱስ ማቴዎስ ስለ ኢትዮጵያውያን በወንጌሉ ስለጻፈ እና በሐገራችን መጥቶ ስላስተማረ ለእርሱ መታሰቢያ እንዲሆን በዕለተ ዕረፍቱ በጥቅምት 12 ዕለት ሲኖዶስን ታደርጋለች ማለት ነው። 🔘በዓመት ሁለት ጊዜ ሲኖዶስ እንዲደረግ መሆኑ ኦሪታዊ መሠረት አለው።ይኸውም በኦሪት ዘኁልቁ ምዕራፍ 10 ከቁጥ 1 ጀምሮ ስንመለከት፦ ✍️“እግዚኣብሔር ሙሴን እንዲህ ብሎ ተናገረው፡-ሁለት የብረት መለከቶች አስጠፍጥፈህ ለአንተ አድርግ፤ ማኅበሩን ለመጥራት ከሰፈራቸውም ለማስጓዝ ይሁኑልህ።ሁለቱም መለከቶች በተነፋ ጊዜ ማኅበሩ ሁሉ ወደ አንተ ወደ ምስክሩ ድንኳን ይሰብሰቡ” እንዳተባለው ይህ መሠረት ሁኖ ሁለቱ መለከቶች ሲነፋ ማኅበሩ ይሰበሰቡ እንደነበረ ዛሬም ይህ ምሳሌ በማድረግ በዓመት ሁለት ጊዜ ቅዱስ ስበሰባ ይደረጋል። 📚ሃይማኖተ አበው ዘቴዎዶስዮስ ምዕ 83፥32👈ማንበብ ይቻላል። 2ኛ፦ሲመተ ክህነት የሚሰጥበት ነው። አምላክ ለመረጠው በቅቶም ለተገኘው ( ሥርዓተ ጵጵስናን ላሟላ ) ሥልጣን ክህነት ( ጳጳሳትን ትሾማለች) ይሰጣል።ከላይ እንደ ተገለጸው በዚህ ዕለት በቅዱስ ጴጥሮስ በኩል ለቤተ ክርስቲያን ሥልጣነ ክህነት የተሰጠበት ስለሆነ በዚህ ዕለት የተገባውን በመሾም በዚያውም የሐዋርያትን ሹመት መታሰቢያ ታደርጋለች።