ወዳጅ አለም ይህ መፍትሔ አይሆንም። የሰው ልጅ በምድር ሲኖር በጣም መጥፎ ዋጋ የሚያስከፍሉትን ስህተቶች ይሰራል። ዋናው ነገር ከስህተቱ መማርና ከወደቁበት መነሳት ነው እንጂ ፈተናውን ከወደቅክማ ሰይጣን አንድ ጥግ ይዞ አሸነፍኩ ብሎ ለራሱ እንዲያጨበጭብ እያደረግከው ነው። የሰው ልጅ ራሱን ለማጥፋት አልተፈጠረም። የሰው ልጅ ራሱን ከተለያዩ ፈተናዎች ጠብቆ ራሱን ለጥሩ ነገር እንዲያበቃ ነው የተፈጠረው። አታምነኝም ነገር ግን ባንተ ላይ እየሄደ ያለው ክፉ ጊዜ ያልፋል። ጥሩ ጸሐይ የምትሞቅበት አስደሳች ጊዜ ይመጣል። ይህ የሚሆነው የፈተና ጊዜያት ባንተ ላይ እንዲያልፉ ስትፈቅድ፣ በራስህ እጅ ራስህን ወደ ጥፋት ካልወሰድክ ብቻ ነው። የተፈጠሩ፣ የሚፈጠሩ ነገሮች ሁሉ ሊያጠነክሩህ፣ ሊያጎለብቱህ እንጂ ለሌላ አይመጡም። የዘመኑ ወንድ ለትንሽ ለትልቁ ራሱ ላይ መጥፎ ውሳኔ የመወሰን አባዜ ተጠናውቶታል። ታገስ ሐቢቢ! ሰው ሁሉ በደረሱበት ችግሮች እንዳንተ ተስፋ እየቆረጡ በነበር ዛሬም ቢሆን የድንጋዩ ዘመን ውስጥ ነበር የምንቀረው። አባትና እናትህ (በአባትም በእናት በኩል ያሉ አያቶችህ፣ ቅድመ አያቶችህ..... እስከ ላይኛው አያቶችህ ሁሉ) አንተ ያሳለፍካቸውን መጥፎ ጊዜያት በዘመናቸው አሳልፈው ነው አንተ ወዲህ የመጣኀው። እንጂማ አንዳቸው ራሳቸውን አጥፍተው ቢሆን አንተም ባልተፈጠርክ። ፈጣሪህ ካንተ ለምድር የሆነ ነገር እንድታበረክት ፈልጎ አምጥቶሃልና ያን አላማ ሳታሳካ፣ ፈጣሪ ያንተ ምድራዊ ድርሻ አብቅቷል ብሎ ወደ ራሱ እስካልወሰደህ ድረስ በትዕግስት ፈተናዎችን ስለማለፍ እያሰብክ ኑር። ይህን መጥፎ ሱስ በምን መልኩ አልፌው ለታናሾቼ መማሪያ እሆናለሁ ብለህ አስበህ፤ ከራስህ እና አትችልም ካሉህ ሰዎችና ስሜቶች ጋር እልህ ተጋብተህ ይህን ችግር ተሻገር። ይህች ምድር ተስፋ ለሚቆርጡ አትሆንም። ጠላትና ተስፋ መቁረጥን አሸንፈህ፤ ከችግሮችህና ከመጥፎው የቁማር ሱስ ተላቀህ ለምስጋና እዚሁ እንደምትመጣ እርግጠኛ ነኝ። ሰኞን በብሩህ ተስፋ፣ ወፈር ባለ ቆራጥነት እንድትጀምረው እመኝልሃለሁ። መልካም ሰኞ!