ለጓደኛው የሚጨነቅ እውነተኛ ወዳጅ በዚህ ዘመን ብርቅ ነው! ምን መሰለሽ እኔም ተመሳሳይ ባህርይ ነው ያለኝ! እውነታው ...በጊዜ ሂደት ያዳበርነው እንጂ ተፈጥሯችን ሆኖ አሊያም ከሰው የተለየ ባህርይ ኖሮን አይደለም! የእኔን ምሳሌ ልንገርሽ በልጅነቴ የሰዎች በተለይ ደግሞ የቅርብ የምላቸው ሰዎች እርዳታ አስፈልጎኝ የነበረባቸው በርካታ አጋጣሚዎች ነበሩ። በእነዚህ አጋጣሚዎች ግን ያግዙኛል ይረዱኛል ይደርሱልኛል ብዬ እጠብቃቸው የነበሩ ሰዎች አልደረሱልኝም ነበር! ይህ ለራሴ ያለሁት እራሴው ነኝ የሚል አስተሳሰብን በውስጤ ፈጥሯል!  ምንም ነገር ብፈልግ ምንም ነገር ቢያስፈልገኝ ያንን ነገር አድርጉልኝ ብሎ ማለት ከዓመታት በኋላም አሁን ድረስ ያታግለኛል! ብቻዬን እንደምታገልና የራሴን ቁስሎች ራሴ የማከም ግዴታ እንዳለብኝ አምናለሁ! ይህ በጊዜ ሂደት የመጣ ልምምድ ስለሆነ ለመመለስም ረጅም ጊዜ የሚወስድ ይመስለኛል! እኔን እየረዳኝ ያለው ምን እንደሆነ ታውቂያለሽ? ወደ ህይወቴ የገቡት ሰዎች ያሳዩኝ ፍቅር እና እንክብካቤ! በቀላሉ ስሜቴ የሚለዋወጥ አይነት ሰው ባልሆንም ስከፋ ፊቴ ላይ ይነበባል፤ ታዲያ ያልኩሽ ሰዎች ገና አይኔን አይተው ስለሚረዱኝ እና ሳልጠይቅ የሚያስፈልገኝን ነገር ስለሚያደርጉልኝ ፍላጎቴን ለእነሱ መንገር ቀስ በቀስ እየቀለለኝ ነው! ጓደኛሽ ስላሳለፈችው ነገር በእርግጠኛነት መናገር ባልችልም ጥሩ ጓደኛ እንዳላት ግን አምናለሁ! ልክ እንደዚሁ ለእሷ ማሰብሽን ቀጥዪ እምነት ልትጥልብሽ እንደምትችል እርግጠኛ ስትሆን ቀስ በቀስ ይህን አመለካከት ማስተካከል የምትችልበትን መንገድ አብራችሁ ፈልጉ! እንደሚሳካላችሁ ተስፋ አደርጋለሁ🙏🙏🙏 መልካም የጓደኝነት ዘመን ተመኘሁ