ፍቅር ለእኔ ልረዳው የማልችለው ዓለም ነው! ሁሌ በቃ ይሄ ነው ተረዳሁት ደረስኩበት ስል ሀ ብዬ የምጀምረው ቅኔ ነው! ከተወሰኑ ዓመታት በፊት ፍቅር ለእኔ ራስ ወዳድነት ነበር! የማፈቅረውን ሰው የራሴ ብቻ ማድረግ፣ እኔን ብቻ እንድትንከባከበኝ መፈለግ፣ ባጭሩ ስግብግብነት ...ከዛ ደግሞ ፍቅር ለእኔ ከራስ በላይ ለሚወዱት ሰው መኖር ለዛ ሰው መሰጠት ህይወትን አሳልፎ እስከመስጠት ...ከሩቅ ሆኖም ቢሆን ለዛ ሰው ደስታን እና መልካምን ሁሉ መመኘት ...እውነቱን ለመናገር አሁንም ገና ብዙ ይቀረኛል! ፍቅር እንዲህ ነው ተብሎ አይነገርም ይኖራል እንጂ፤ የፍቅርን እንፋሎት ይሞቁታል እንጂ አይጨብጡትም! ሰውን አወቅኩት አይባል ነገር ምግብ አይደል አይቀመስ! ፍቅር እምነት ነው! ፍቅር ራስን አሳልፎ መስጠት ነው ፍቅር ...ብዙ ነው! ለእኔ ትልቁ ነገር በዙሪያዬ ያሉ ለእኔ ስኬት ብዙ የደከሙ፣ በፀሎታቸው ያሰቡኝ እና የእኔን መልካም ለተመኙ ሁሉ መኖር ነው! ያለእነሱ እኔ እኔ አልሆንም ነበር! የእነሱን ደስታ ማየት እፈልጋለሁ! አንዳንዴ ተስፋ ብቆርጥም፣ ብዝልም፣ ግራ ብጋባም የመኖሬ ምክንያቶች እነሱ ናቸው! ከራሴም፣ ከሰውም ከአምላክም ጋር ሰላም ፈጥሮ መኖር...ለእኔ ትልቁ ነገር ያ ነው