ታዲያስ 🙂 አንድ ታሪክ ላጫውትሽ ምናልባት ከጠቀመሽ! በአንድ ሃገር ውስጥ የሚኖር ድሃ ለማኝ ነበር! ይህ ለማኝ የከተማዋ መግቢያ ላይ ቁጭ ብሎ ለበርካታ ዓመታት በዚያ መንገድ የሚመላለሱ ሰዎችን፣ ሲራራ ነጋዴዎችን አለፍ ሲልም በለስ የቀናው ዕለት ባለስልጣናትን እና ነገስታትን ምፅዋት እየለመነ ዕድሜውን የገፋ ሰው ነው! ከዕለታት በአንዱ ቀን ታዲያ ይህ ለማኝ በሚቀመጥበት መንገድ አንድ ጥበበኛ ሰው ያልፋል ሰውየውም ትኩር ብሎ ከተመለከተው በኋላ “ወንድሜ ሆይ ምን አጋጥሞህ ነው” በማለት ይጠይቀዋል! ለማኙም ከልጅነቱ ጀምሮ ስላጋጠመው ችግርና መከራ ካወራው በኋላ ዕድሜ ዘመኑን ሁሉ በዚያ ቦታ ተቀምጦ በሚመፀወትለት ገንዘብ ህይወቱን እንዳቆየ በተሰበረ እና በትካዜ ድምፅ ያወጋዋል! አስተዋዩ ተጓዥም ትኩር ብሎ ሲመለከት ሰውየው የተቀመጠበት ቦታ ስር በከፊል የሚታይ የተቀበረ ሳጥን አለ! ሰውየውም ቀበል አድርጎ “በእርግጥ ያወጋኸኝ ታሪክ ያሳዝናል ነገርግን የተቀመጥክበትን ቦታ አስተውለኸው ታውቃለህ? የተቀመጥክበት በከፊል የተቀበረ ሳጥንን ለማውጣትና ለማየት ሞክረህ ታውቃለህ?” በማለት ሲጠይቀው ለማኙም “እኔ እዚህ ቦታ ለመለመን ገና ልጅ እያለሁ ጀምሮ ስመጣ ይህ ሳጥን ተቀብሮ ነበረ ነገር ግን ልመናን እንጂ ቁፋሮን ሞክሬ አላውቅም” ብሎ መለሰለት! በጥበበኛው ሰው ጉትጎታ በመጨረሻ ተስማምቶ አብረው ያንን ሳጥን ቆፍረው ካወጡ በኋላ በውስጡ እጅግ በጣም የከበሩ ማዕድናትና የወርቅ ሳንቲሞችን አገኙ! ይህን ታሪክ ያነሳሁልሽ ያለምክንያት አይደለም! ያለንበትን ቦታ አለማስተዋል ገና ድሮ ልናገኝ እንችል የነበረውን መልካም አጋጣሚ እንድናጣው ያደርገናል! ነጥቤ ምን መሰለሽ! ትምህርቱን ካልወደድሽው እና ልብሽ የሚያደላበት Department ካለ ወደዛ ለመዛወር ሞክሪ! ቤተሰብ እንድትማሪ የሚፈልጉበት የራሳቸው ምክንያት ይኖራቸዋል ምናልባትም የእነሱን ቁጭት በአንቺ ለመወጣት እና የተሻለ ቦታ ላይ እንድትደርሺላቸው ሲሉ ይሆናል! ወደፊት ወደ ንግዱ አለም ብትገቢ ራሱ የሚኖርሽ ተሰሚነት ፊደል ቆጥረሽና ሳትማሪ እኩል አይደለም! ነገሮችን የምትመለከቺበትን መንገድም ይቀይረዋል ከብዙ አቅጣጫ በመመልከት ውሳኔ እንድትወስኚ ያግዝሻል! መማርሽን አትጥዪው! ወደፊት በንግዱ አለም መሰማራት የምትፈልጊ ከሆነም በየትኛው ንግድ መግባት እንደምትፈልጊና ምን ነገር ማወቅ እንዳለብሽ ከወዲሁ አስቢ/መረጃዎችን አፈላልጊ! ለዛ ሊረዳሽ የሚችል የትምህርት መስክ ተማሪ! ደግሞም ታድለሻል ቤተሰቦችሽ ጥሩ ሁኔታ ላይ ስላሉ ለመነሻ የሚያስፈልግሽን ነገር መጠየቅ ትቺያለሽ! ሳጥን ላይ የተቀመጠውን ለማኝ አስታውሺ እህቴ ሳጥኑን ክፈቺው እና ወርቁን ተጠቀሚበት! 🙏 ብዙም ባይሆን ትንሽ እንደምትማሪበት ተስፋ አደርጋለሁ! መልካሙ ሁሉ ይግጠምሽ! የልብሽን መሻት የምታምኚው አምላክ ይሙላልሽ 🙏