ይህችን አመት ተወኝ ከዓመት እስከ ዓመት ፍሬን ሳላፈራ ደረቅ እንደሆንኩኝ በራድ ወይም ትኩስ ሁለቱንም ሳልሆን እንዲያው ለበ እንዳልኩኝ አለሁኝ በቤትህ ለሙን መሬትህን እንዳጎሳቆልኩኝ አውቃለሁ አምላኬ ፍሬን ለመቀበል እንዳመላለስኩህ ዛሬም ሳላፈራ እሾህን አብቅዬ ደርቄ ጠበቅሁህ ያልተደረገልኝ ያላፈሰስክብኝ ያልሰጠኸኝ የለም ነገር ግን ይህ ሁሉ አላርምህ አለኝ አለየኝም ካለም የማትሰለቸኝ ሆይ ተነስቼ እስክቆም እባክህ ታገሰኝ የኔን ክፋት ተወው መልዐክህን ሰምተህ ይህችን ዓመት ተወኝ አውቃለሁ ታውቃለህ ቀጠሮን ሰጥቼ እንደማላከብር ብዙ ጊዜ አቅጄ ብዙ ጊዜ ዝቼ በወሬ እንደምቀር ዘንድሮስ እንዳልኩኝ አምና ይሄን ጊዜ ሰምተኸኝ ነበረ ምንም ሳልለወጥ ዘንድሮዬ አልፎ በአዲስ ተቀየረ ፍሬ የማይወጣኝ እኔን በመኮትኮት እጆችህ ደከሙ እኔ ግን አለሁኝ ዛሬም አልበቃኝም በኃጥያት መታመሙ የቃልህን ውሃ በድንጋይ ልጅህ ላይ ሳትታክት ስታፈስ ዘመን ተቆጠረ ወደ ልቤ ሳይሰርግ ሕይወቴን ሳይለውጥ እንዲያው ፈስሶ ቀረ ቃልህን ጠግቤ እያገሳሁት ነው ሌሎች እስኪሰሙ በቃልህ መኖር ግን አልያዝህ አለኝ ከበደኝ ቀለሙ ብዙ ጥቅስ አገኘው ከቅዱስ መጽሐፍህ ገልጬ አይቼ ከራሴ ላይ ብቻ አንድ ጥቅስ አጣሁኝ በበደል ተኝቼ ውጤቴ ደካማ ትምህርት የማይሰርጸኝ ተማሪ ብሆንም ይህችን ዓመት ተወኝ ደግሞ ትንሽ ልማር ታገሰኝ አሁንም እባክህ አልቆረጥ በቅዱስ መሬትህ ልቆይ ፍቀድልኝ ያፈሩት ቅዱሳን የፍሬያቸው ሽታ መዓዛ እንዲደርሰኝ የተሸከምከኝ ሆይ ዛሬም ተሸከመኝ አትሰልቸኝ አደራ ማን ይታገሰኛል ጠላት እየሆንኩት አይሰሩ ስሰራ አታውጣኝ ከቤትህ ብዙ ቦታ አልይዝም ፍሬ ስለሌለኝ ስፍራ የማያሻኝ ቤት የማላጣብብ ፍሬ አልባ በለስ ነኝ ቦታስ የሚይዙት ባለምግባሮቹ ቅዱሳንህ ናቸው ልክ እንደ ዘንባባ የተንዘረገገ ተጋድሎ ጽድቃቸው ከሊባኖስ ዝግባ እጅጉን የበዛ ገድል ትሩፋታቸው እኔ አይደለሁም ቦታስ የምትይዘው ያንተስ እናት ናት ስሮቿ በምድር ጫፎቿ በሰማይ ሲደርሱ ያየናት ይህችን ዓመት ተወኝ ከስሯ እሆናለሁ ባፈራ ምናልባት ይህችን ዓመት ተወኝ እባክህ አምላኬ አንድ ዓመት ምንህ ናት ሺህ ዓመት አንድ ቀን አይደለም ወይ ላንተ ዓመት ኢምንት ናት ይሄ ዓመት አልፎ ዳግም ዓመት ስጠኝ እስከምልህ ድረስ እባክህን ጌታ ይህችን ዓመት ተወኝ የወጉን እንዳደርስ አዲስ የበገና መዝሙር ዘማሪ ዲያቆን ቀዳሜጸጋ ዮሐንስ