እግዚአብሔር ለታመሙት እናትህ ጤናና እድሜ ይስጥልህ ። ጠበል መጠመቃቸው መልካም ሆኖ ሳለ ድኅነት ቅጽበታዊ አይደለምና በእምነትና በተስፋ የሙጥኝ ማለቱ መልካም ነው። ይኽ እንዳለ ሆኖ ቅዱስ ያዕቆብ በመልዕክቱ ከእናንተ መከራን የሚቀበል እርሱ ይጸልይ ደስ የሚለውም ማንም ቢኖር እርሱ ይዘምር ከእናንተ የታመመ ማንም ቢኖር እርሱ የቤተክርስቲያን ሽማግሌዎችን ወደርሱ ይጥራ በጌታም ስም እርሱን ዘይት ቀብተው ይጸልዩለት የእምነትም ጸሎት ድውዩን ያድናል ጌታም ያስነሣዋል ኃጢያትም ሠርቶ እንደሆን ይሰረይለታል በማለት የተናገረው ቃል አለ ይኅ በቤተክርስቲያናችን ሚሥጢረ ቀንዲል በመባል ይታወቃል የንስሃ አባታችሁን በመጥራት አስቀድማችሁ ቤት ውስጥ ያላችሁ ሁላችሁ ንስሃን በመግባት ለእናታችሁ ሚስጥሩ እንዲፈጸምላቸው ማነጋገር መልካም ነው። ሚሥጢሩ የሚፈጸምበት የራሱ የሆነ ሥርዐት አለው። የቅዱሱ ሐዋርያ ቃል የታመነ ነውና ጌታም ባታምኑት እንኳ የታመነ ነውና ባለማመናችን አለማመኔን እርዳው በማለት ባለመታመናችን ይቅርታን እየለመንን የምንሻው ድኅነት ለሥጋም ለነፍስም ጠቃሚ እንደመሆኑ እናትህ እንደሚድኑ ተስፋ አደርጋለው። አይዞኽ ። እግዚአብሔር ይርዳችሁ። የያዕቆብ አምላክ ስም ብርታት ይሁናችሁ። ኪዳነምሕረት ትዳብስልኽ። በጸሎት እናስባችኋለን።